वैकल्पिक ऊर्जा एक मात्र विकल्प : मुख्यमन्त्री शाही

सुर्खेत, १८ जेठ- कर्णाली प्रदेशका मुख्यमन्त्री महेन्द्रबहादुर शाहीले कर्णाली प्रदेशको ऊर्जा संकट समाधानका लागि वैकल्पिक ऊर्जा एकमात्र विकल्प भएको बताउनुभएको छ ।

वैकल्पिक ऊर्जा प्रवद्र्धन केन्द्र, काठमाडौँद्वारा प्रदेश राजधानी वीरेन्द्रनगर, सुर्खेतमा बिहीबार आयोजित ‘नवीकरणीय ऊर्जा प्रवद्र्धनमा प्रदेश सरकारको भूमिका’ विषयक कार्यशाला गोष्ठीमा मुख्यमन्त्री शाहीले यो कुरा बताउनुभएको हो ।

कार्यक्रममा उहाँले यो प्रदेशमा ठूला जलविद्युत् आयोजना निर्माण नहुञ्जेलसम्म विद्युतीकरणको एकमात्र विकल्प वैकल्पिक ऊर्जा रहने औँल्याउनुभयो ।

राष्ट्रिय विद्युत् प्रसारण लाइन नपुगेका कर्णालीका विभिन्न स्थानमा वैकल्पिक ऊर्जाको विशेष कार्यक्रम सञ्चालन गर्न उहाँले प्रवद्र्धन केन्द्रलाई आग्रह गर्नुभयो । तत्काल विद्युतीकरणको आवश्यकता पूरा गर्न वैकल्पिक ऊर्जा विकासमा जोड दिएर राजधानी वीरेन्द्रनगरलगायत सबैतिर विद्युतीकरण गर्ने लक्ष्य लिइएको उहाँको भनाइ थियो ।

मुख्यमन्त्री शाहीले भन्नुभयो “कर्णाली २३ हजार मेगावाट विद्युत् उत्पादन क्षमता भएको प्रदेश हो, यद्यपि यसका लागि बन्ने मेगा परियोजना अहिले नै निर्माण हुने स्थिति छैन ।” उहाँले वैकल्पिक ऊर्जाको उपभोगमार्फत खानेपानी, सिँचाइ र विद्युतीकरणका समस्या समाधान हुने र उत्पादन वृद्धि गर्नसमेत सकिने बताउनुभयो ।

कर्णाली प्रदेशमा वैकल्पिक ऊर्जाको प्रयोगमार्फत जनताको समस्या हल गर्नका लागि प्रदेश सरकारसमेत लगानी गर्न तयार रहेको बताउँदै मुख्यमन्त्री शाहीले गुणस्तरीय र दिगोरुपमा काम गर्न वैकल्पिक ऊर्जा केन्द्रलाई आग्रह गर्नुभयो ।

प्रदेश राजधानी सुर्खेतमा तत्काल एक मेगावाटको सोलार प्लान्ट निर्माण गर्न पनि वैकल्पिक ऊर्जा प्रवद्र्धन केन्द्रलाई आग्रह गर्नुभयो । प्रदेश राजधानीमा विद्युत् आपूर्तिमा भएको समस्याका कारण प्रदेश सरकारको कार्यसम्पादनमा असहजता भएको बताउँदै उहाँले भन्नुभयो, “प्रदेशसभा र मन्त्रालयमा विद्युत् नहुँदा काम गर्न गाह्रो छ, तत्काल सौर्य विद्युत् प्रणाली स्थापनामा केन्द्रले सहयोग पु¥याओस् ।”

कार्यशाला गोष्ठीमा कर्णाली प्रदेशसभाका सभामुख राजबहादुर शाही, नेपाली काँग्रेस संसदीय दलका नेता जीवनबहादुर शाही, पूर्वमन्त्री एवं सांसद यमलाल कँडेल र वैकल्पिक ऊर्जा प्रवद्र्धन केन्द्रका कार्यकारी निर्देशक रामप्रसाद धिताललगायतले देशका सात प्रदेशमध्ये कर्णाली प्रदेशलाई नै ऊर्जा विकासमा जोड दिनुपर्ने बताउनुभएको थियो ।रासस

तपाईं हामीसंग फेसबुकट्वीटरर युट्युव मार्फत् पनि जोडिन सक्नुहुन्छ ।

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time